Gengur varla að fara í þriggja ára samstarf með bundið fyrir augun

„Það gengur varla að fara í þetta þriggja ára samstarf með bundið fyrir augun," segir Gylfi Arnbjörnsson formaður ASÍ sem þarf að taka ákvörðun fyrir lok dags á morgun um hvort forsendur séu fyrir þriggja ára samningum eða aðfararsamningur til eins árs verði látinn gilda.

Ögmundur Jónasson innanríkisráðherra átti fund með aðilum frá ASÍ og Samtökum Atvinnulífsins í gær en þar höfðu menn lýst því yfir að meintur skortur á efndum ríkisstjórnarinnar hefðu sett endurskoðun á forsendum nýgerðar kjarasamninga í uppnám.

Í kvöldfréttum okkar í gær sagði Ögmundur enga óvissu vera um kjarasamningana. Er forseti ASÍ sammála því?

„Það er ekki hans að taka ákvörðun um það hvort að kjarasamningar öðlist gildi á morgun eða ekki heldur skulum við láta samningsaðilana sjá um þann hluta," segir Gylfi og bendir á það hafi verið gerð krafa um að það væri ráðist í framkvæmdir í vegamálum. En nú sé það ljóst að ekki verður ráðist í þær framkvæmdir. „Við höfum einfaldlega spurt: Hvað á að koma annað?," og við því hafi ekki fengist nein svör.

Fyrir lá að menn ætluðu að fjármagna vegaframkvæmdir með vegatollum en Ögmundur hefur sagt andstöðu við þau áform mikla í samfélaginu, og meðal annars vitnað í undirskriftir 40 þúsund Íslendinga.

Gylfi segist gera sér grein fyrir að mikil andstaða hafi verið við málið í upphafi, en menn hafi unnið vel í því að breyta umfanginu og meðal annars farið í ódýrari lausnir. En hinsvegar sé sú biturlega staðreynd að ríkissjóður er tómur.

Aðilar vinnumarkaðarins þurfa að taka ákvörðun fyrir lok dags á morgun og segir Gylfi að fundað verði stíft fram að þeim tíma.

Meðal annars verði fundað með embættismönnum um hvað sé í pípunum í stórframkvæmdum og stöðu þeirra áætlana sem átti að vera búið að kynna fyrir lok maí. Mikilvægt sé að fá þessi mál á hreint.

„Það gengur varla að fara í þetta þriggja ára samstarf með bundið fyrir augun," segi Gylfi að lokum.