Hinsegin dagar hlutu verðlaun

Hinsegin dagar hlutu í gær Mannréttindaverðlaun Reykjavíkurborgar. Jón Gnarr borgarstjóri afhenti Þorvaldi Kristinssyni, forseta Hinsegin daga, verðlaunin í Höfða.

Borgarstjóri sagði við afhendingu verðlaunanna að samtökin væru vel að viðurkenningunni komin og að hinsegin dagar ættu stóran þátt í viðhorfsbreytingu sem orðið hafi gagnvart samkynhneigð á Íslandi. Það endurspeglaðist meðal annars í endurbótum á lögum.

Mannréttindaverðlaunin eru veitt þeim sem hafa á eftirtektarverðan hátt staðið vörð um mannréttindi tiltekinna hópa. - þeb