Steingrímur: Ekki æskilegt að hækka skatta frekar

Fjármálaráðherra telur eðlilegt að skoða áhrif skattabreytinga á mismunandi hópa, en úttekt OECD bendir til að einstæðir foreldrar á Íslandi hafi tekið á sig mestu hækkanirnar. Hann segir ekki æskilegt að hækka skatta frekar.

Samkvæmt skattaúttekt Efnahags- og framfarastofnunarinnar OECD jókst skattbyrði einstæðra foreldra tveggja barna, með tekjur undir meðallagi, meira en tvöfalt á milli áranna 2009 og 2010 í krónum talið. Eins og fréttastofa greindi frá í gær var hlutfallsaukningin mun minni hjá öðrum hópum sem úttektin tók til, þó þar hafi raunar verið litið fram hjá ákveðnum lífeyrisgreiðslum.

Fréttastofa spurði Steingrím J. Sigfússon, fjármálaráðherra, hvort þetta væri í anda sitjandi ríkisstjórnar.

„Það þarf nú að skoða þær forsendur sem þarna eru bornar saman, og lesa þar inn í launaþróun og margt fleira," segir Steingrímur. „Aðalatriðið er nú það að þessi skýrsla, þvert á allan sönginn hér, sýnir það að skattbyrðin er enn undir meðaltali á Íslandi, samanborið við OECD. Eftir sem áður erum við eitt af Norðurlöndunum, þar sem er sterkt velferðarkerfi sem fjármagnað er með opinberum tekjum. Það að Ísland skuli vera undir meðaltali OECD, þrátt fyrir þessar breytingar, sýnir hvar við erum stödd í þessum efnum; almennt er skattbyrði ekki þung á Íslandi."

Það sé þó eðlilegt að gefa áhrifum skattkerfisbreytinganna á einstaka hópa gaum.

„Það er alveg á sínum stað að skoða útkomu einstakra hópa, eins og til dæmis hvernig einstæðir foreldrar koma undan þessum breytingum. Það er flókið samspil sem þar þarf að líta til, og einnig hin hliðin; bætur og stuðningur sem kemur úr öðrum áttum. Það nægir ekki að skoða bara skattkerfið eitt þegar afkoma einstakra hópa eru skoðuð."

En er svigrúm fyrir frekari skattahækkanir fyrst Ísland er undir meðaltali OECD?

„Nei, það er ekki æskilegt að þurfa að hækka skatta mikið, og var náttúrulega óæskilegt að þurfa að gera það yfir höfuð," segir Steingrímur. „En hefðum við ekki farið í þær tekjuöflunaraðgerðir sem við þó gerðum, þá hefðu tekjur ríkisins haldið áfram að minnka. Með þeim breytingum sem við höfum gert höfum við fyrst og fremst náð fram tvennu; við höfum stórkostlega lagfært dreifingu skattbyrðarinnar, hlíft hinum tekjulægstu og lagt meiri byrðar á þá sem betur eru settir. Við höfum einnig náð að stöðva tekjufall ríkisins sem efnahagshrunið hafði í för með sér," segir Steingrímur, sem segist í það heila tekið ánægður með aðgerðirnar til að draga úr fjárlagahallanum.

Fjármálaráðherra segir þó eðlilegt að skoða hvernig einstakir hópar eins og einstæðir foreldrar komi út úr breytingum á skattkerfinu. Þar nægi þó ekki að líta eingöngu til skattkerfisin, heldur samspils við aðra þætti eins og bætur og stuðning úr öðrum áttum.