„Það er að færast aukin harka í leikinn"

„Í verkfallsréttinum felst heimild til að koma í veg fyrir að gengið sé í störf þeirra sem eru í verkfalli. Ef deildarstjóri er í verkfalli, og það er hans hlutverk að stýra deildinni, þá má enginn ganga í það starf," segir Erna Guðmundsdóttir, lögfræðingur Kennarasambands Íslands, sem Félag leikskólakennara heyrir undir.

Forsvarsmenn Sambands íslenskra sveitarfélaga meta það hins vegar sem svo að ekki þurfi að leggja niður starfsemi deildarinnar þó deildarstjórinn sé í verkfalli og ennfremur að heimilt sé til að færa á milli deilda það starfsfólk sem ekki er í verkfalli.

„Við bara ítrekum okkar túlkun á því hvenær nauðsynlegt er að loka deild og hvenær ekki," segir Erna og vísar í verklagsreglur sem leikskólastjórnendur hafa fengið til að hafa til hliðsjónar ef til verkfalls kemur.

Þar segir meðal annars að ef deildarstjórar leikskóla eru ekki í Félagi leikskólakennara má viðkomandi deild taka við börnum sem skráð eru þangað, en ekki af öðrum deildum. Algengast er að aðstoðarleikskólastjórar í Reykjavík starfi einnig sem deildarstjórar og munu þeir því halda áfram að taka á móti leyfilegum fjölda barna er miðast við útreikninga á fjölda barna á hvern starfsmann. Þá munu ófaglærðir starfsmenn leikskóla, sem ekki eru í Félagi leikskólakennara, einnig mæta áfram til vinnu ef til verkfalls kemur.

Erna vekur ennfremur athygli á því að þeim starfsmönnum leikskóla sem ekki fara í verkfall, ef til verkfalls kemur, er óheimilt að ganga í störf og sinna verkefnum þeirra sem eru í verkfalli. „Ef þetta væri hægt þá væri enginn tilgangur með verkfalli," segir hún.

Spurð hvernig það megi vera að túlkun sveitarfélaganna sé svo frábrugðin túlkun leikskólakennara, segir hún: „Þegar viðsemjendur eru búnir að sitja lengið við fer að myndast meiri spenna. Það er að færast aukin harka í leikinn. Dagsetningin 22. ágúst nálgast."

Verkfall blasir við ef ekki nást samningar fyrir mánudag. Ekki hefur verið boðað til nýs samningafundar.