Fjölnismenn upp að hlið Skagamanna á toppnum

Fjölnir komst upp að hlið Skagamanna á toppi 1. deildar karla eftir 2-0 sigur á Víkingum úr Ólafsvík í Grafarvoginum í kvöld en bæði Fjölnir og ÍA hafa unnið tvö fyrstu leiki sína í deildinni.

Fjölnismenn náðu þó ekki að taka toppsætið af Skagamönnum sem eru með betri markatölu en Grafarvogspiltar.

Illugi Þór Gunnarsson og Guðmundur Karl Guðmundsson skoruðu mörk Fjölnis í kvöld en þeir hafa því skorað í tveimur fyrstu leikjum liðsins í ár. Bæði mörkin komu í seinni hálfleiknum.

Það gengur hinsvegar ekki vel hjá nýliðum Víkinga úr Ólafsvík í byrjun móts en þeir hafa tapað tveimur fyrstu leikjum sínum og sitja á botni 1. deildarinnar.

Upplýsingar um markaskorara eru fengnar af vefsíðunni fótbolti.net.