Verndar- og nýtingaráætlun samþykkt á Alþingi

Alþingi hefur samþykkt lög sem Katrín Júlíusdóttir iðnaðarráðherra lagði fram um verndar- og nýtingaráætlun vegna virkjunar fallvatna og háhitasvæða. Í tilkynningu frá ráðuneytinu segir að lögin skapi nauðsynlegan ramma um lagalegan sess rammaáætlunar um vernd og nýtingu náttúrusvæða.

„Lögin kveða m.a. á um hvernig staðið skuli að endurskoðun rammaáætlunarinnar. Þá er kveðið á um að iðnaðarráðherra skuli leggja fram með reglulegu millibili þingsályktun um nýtingu vatnsafls og jarðvarma, sem byggir á niðurstöðum rammaáætlunar," segir ennfremur.

Katrín segir að á næstunni muni Alþingi fá gríðarstórt verkefni í hendur þegar farið verði yfir flokkun á mögulegum virkjana- og verndarkostum þegar kemur að nýtingu náttúru- og orkuauðlinda á Íslandi. Ráðherrann segir að lögunum sé Alþingi búið að setja sér leikreglur sem varða þá lagalegu meðferð sem væntanleg flokkun mun fá.

Ennfremur segir að miklu máli skipti að yfirsýn náist yfir virkjanamöguleika og hvaða svæði við ætlum að vernda.

Þegar rammaáætlunin liggur fyrir verður samin tillaga til þingsályktunar sem verður send í opið kynningarferli í samræmi við reglur sem gilda um umhverfismat áætlana. Þingsályktunin verður síðan lögð fyrir alþingi þegar þing kemur saman í haust.