Icesave situr í evrópskum þingmönnum

Þingmenn Evrópuþingsins telja neitun Íslendinga á Icesave samningum geta haft slæm áhrif á umsókn okkar í sambandið. Viðræður um sjávarauðlindir okkar eru enn ekki hafnar. Þetta segir Ólöf Nordal, varaformaður Sjálfstæðisflokksins, en hún sat fund sameiginlegrar þingmannanefndar Íslands og Evrópusambandsins í gær.

Sameiginleg þingmannanefnd Íslands og Evrópusambandsins hittist tvisvar á ári og er nefndin skipuð níu þingmönnum frá Evrópuþinginu og níu Alþingismönnum. Nefndin hittist fyrst þann 5. október 2010 og var fundurinn í gær því annar fundur nefndarinnar. Á fundinum var farið almennt yfir stöðu aðildarferlisins og hvernig það gangi fyrir sig. Þeir íslensku þingmenn sem fundinn sátu útskýrðu afstöðu þjóðarinnar í Icesave deilunni en þingmenn Evrópuþingsins voru sumir ósáttir við höfnun íslensku þjóðarinnar á samningnum.

„Við greindum frá þeirri stöðu sem hér er uppi, okkar lagalegu sjónarmið í Icesave deilunni. Það kom fram í máli þingmanna frá Evrópuþinginu að þeir töldu þetta Icesave mál tengjast okkar aðildarumsókn og því var hafnað af hálfu íslenskra aðila."

Ólöf Nordal, sem sat fundinn í fjarveru Bjarna Benediktssonar formanns Sjálfstæðisflokksins, segir undarlegt að stóru málin um auðlindirnar - bæði landbúnaðinn og fiskveiðarnar - séu ekki enn komin á dagskrá.

„Það sem kemur fram aftur og aftur er að við erum ekki ennþá farin að horfa á þau atriði sem verulegur ágreiningur er um milli okkar og evrópusambandsins í þessu ferli. og þá er ég að tala fyrst og fremst um fiskveiðar og landbúnað. og meðan við erum ekki farin að taka þá kafla sérstaklega fyrir þá finnst manni eins og þetta ferli sé ekki komið á neitt stig."

Eitt af markmiðum fundarins var að setja saman ályktun en það tókst ekki.

„Nei, það var ágreiningur um það sem snerist til dæmis um hvaða atriði okkur finnst skipta mestu máli í markmiðum aðildarviðræðna, eins og fiskveiðistjórnunarkerfið og önnur atriði."