Þóra og Dóra María koma inn í liðið fyrir Danaleikinn

Sigurður Ragnar Eyjólfsson, landsliðsþjálfari, hefur tilkynnt byrjunarliðið er mætir Dönum á Algarve á morgun, mánudaginn 7. mars, kl. 15:00. Sigurður gerir tvær breytingar frá því í sigurleiknum gegn Kína á föstudaginn.

Þóra Björg Helgadóttir kemur í markið í staðinn fyrir Guðbjörgu Gunnarsdóttur og Dóra María Lárusdóttir kemur inn á hægri kantinn fyrir Fanndísi Friðriksdóttur.

Íslenska liðið er í efsta sæti B riðils með sex stig en Danir og Svíar eru með þrjú stig. Með jafntefli þá tryggir liðið sér sæti í úrslitaleik mótsins gegn Bandaríkjunum.

Fyrirliðinn Katrín Jónsdóttir er sem fyrr í byrjunarliðinu en hún leikur sinn 105. landsleik og setur þar með nýtt landsleikjamet.

Dóra María Lárusdóttir er að leika sinn fyrsta leik á mótinu en hún gat ekki spilað tvo fyrstu leikina vegna meiðsla.

Byrjunarliðið á móti Dönum:Markvörður: Þóra Helgadóttir

Hægri bakvörður: Þórunn Helga Jónsdóttir

Vinstri bakvörður: Ólína Guðbjörg Viðarsdóttir

Miðverðir: Sif Atladóttir og Katrín Jónsdóttir, fyrirliði

Tengiliðir: Edda Garðarsdóttir og Sara Björk Gunnarsdóttir

Sóknartengiliður: Katrín Ómarsdóttir

Hægri kantur: Dóra María Lárusdóttir

Vinstri kantur: Hallbera Guðný Gísladóttir

Framherji: Margrét Lára Viðarsdóttir