Á gangi án hrings

Söngkonan Katy Perry og Russell Brand eyddu jólunum hvort í sinni heimsálfunni sem ýtir enn frekar undir sögusagnir um yfirvofandi skilnað hjónanna. Perry og Brand giftu sig í október árið 2010.

Perry eyddi jólunum á Hawaii ásamt vinum sínum og var mynduð á ströndinni án giftingarhringsins. Brand var síðan myndaður í London á þriðjudaginn og var einnig án giftingarhrings. Samkvæmt bandarískum slúðurmiðlum áttu hjónin að hafa rifist heiftarlega stuttu fyrir jól og því ákveðið að eyða hátíðinni fjarri hvort öðru. Talsmenn parsins hafa ekki viljað tjá sig um sögusagnirnar eins og þeir hafa iðulega gert og þykir mörgum það til merkis um að hjónabandið sé ótraust.

Perry og Brand hafa alveg frá því að þau giftu sig þurft að verjast fréttum af yfirvofandi skilnaði, enda kom hjónabandið mörgum í opna skjöldu. Brand lýsti því meðal annars yfir í spjallþætti að hann vildi eignast börn en nú virðast þau plön hafa verið sett á ís.