Útilokar ekki endurkomu Guns N’ Roses

Axl Rose, forsprakki hljómsveitarinnar Guns N‘ Roses, segir ekki útilokað að upprunalegir meðlimir hljómsveitarinnar komi saman á næsta ári.

Guns N‘ Roses verður tekin inn í frægðarhöll rokksins í Cleveland í Bandaríkjunum á næsta ári. Hefð er fyrir því að listamennirnir sem hljóta heiðurinn komi fram á athöfninni og Rose, sem er eini upprunalegi meðlimur hljómsveitarinnar eins og hún lítur út í dag, var spurður út í það í viðtali við dagblaðið Los Angeles Times á dögunum.

„Ég veit ekki alveg hvað mér finnst um Frægðarhöll rokksins, en á sama tíma ber ég virðingu fyrir því að aðdáendurnir kunni að meta hana,“ sagði Rose. Hann sagðist vera til í að stíga á svið með bassaleikaranum Duff McKagan og meira að segja gítarleikaranum Slash, þrátt fyrir að þeir tveir hafi eldað grátt silfur í gegnum tíðina. Hann var hins vegar ekki til í að hafa trommuleikarann Steven Adler og gítarleikarann Izzy Stradlin með. „Ég hef ekkert á móti þeim, þá langar kannski að vera með, en ég ætla ekki að vinna með þessum gaurum,“ sagði Rose, án þess að skýra afstöðu sína nánar.