Leaves með nýja plötu árið 2012

„Hún verður gjörólík síðustu plötu,“ segir Arnar Guðjónsson, söngvari Leaves.

Hljómsveitin, sem var eitt sinn á mála hjá stórum erlendum útgáfufyrirtækjum, ætlar að gefa út fjórðu plötu sína á fyrri hluta næsta árs, en tvö ár eru liðin síðan We Are Shadows kom út. Nýi gripurinn hefur verið í vinnslu síðustu tvö ár og núna styttist í að hann líti dagsins ljós. „Þetta er búið að vera dálítið langt ferli. Platan hefur orðið til hægt og rólega,“ segir Arnar.

Spilað hefur inn í hægaganginn að tveir meðlimir Leaves, hljómborðsleikarinn Kjartan F. Ólafsson úr Ampop og trommarinn Nói Steinn Einarsson, fluttust til útlanda. Kjartan fór til Glasgow, þar sem hann býr enn, á meðan Nói Steinn flutti til Svíþjóðar. Hann er núna fluttur heim til Íslands.

Tíu ár eru liðin síðan Leaves var stofnuð og söngvarinn Arnar er eini upphaflegi meðlimurinn. Hann segir þrjár síðustu plötur allar hafa verið gjörólíkar enda hafi hljómsveitin ávallt reynt að prófa nýja hluti á ferli sínum. Hann býst við álíka miklum breytingum á nýju plötunni. Hún verður sú fyrsta með Kjartani og Elísi Péturssyni, bassaleikara Jeff Who?, sem gekk til liðs við Leaves fyrr á árinu.

-fb