Sanngjarn sigur Hollendinga á slökum Dönum

Danir ollu vonbrigðum í leiknum gegn Hollandi í dag. Hollendingar fóru með öruggan 2-0 sigur af hólmi og hefðu getað unnið stærra.

Fyrsta sjálfsmark keppninnar leit dagsins ljós í seinni hálfleik þegar Simon Paulsen fékk boltann í hausinn, hann fór af honum í bakið á Daniel Agger og þaðan inn.

Danir sóttu varla í seinni hálfleik og Hollendingar skoruðu aftur þegar Dirk Kuyt rúllaði boltanum yfir línuna eftir að skot Eljero Elia fór í stöngina.

Varamaðurinn Ibrahim Afellay hélt að hann hefði skorað undir lokin en Poulsen gerði vel og bjargaði á línu.

Hollendingar voru ekki sannfærandi en sigurinn var þó þægilegur. Danir litu illa út í seinni hálfleik en voru þó ágætir í þeim fyrri. Skyndisóknir þeirra þá voru ágætar, án þess að þær skiluðu árangri.