Elsti HM-hópur Englendinga í sögunni - meðalaldur liðsins 28,7 ár

Fabio Capello, landsliðsþjálfari Englendinga, setti nýtt met þegar hann tilkynnti 23 manna HM-hópinn sinn í gær  því þetta er elsti HM-hópur Englendinga í sögunni. Capello tryggði sér metið með því að velja hinn 28 ára gamla Shaun Wright-Phillips yfir hinn 21 árs Theo Walcott. Þetta kom fram á Guardian.

Meðalaldur enska hópsins á HM í Suður-Afríku er 28,7 ár og bætir þar með metið frá HM 1954 þegar meðalaldur enska hópsins var 28,4 ár. Meðalaldur liðsins hækkar um nærri þrjú og hálft ár frá því á HM í Þýskalandi fyrir fjórum árum síðan. Þegar Englendingar urðu heimsmeistarar í fyrsta og eina skiptið 1966 þá var meðalaldur hópsins 26,5 ár.

Enski hópurinn hefur einnig aldrei verið reyndari á HM en leikmenn HM-hópsins hafa leikið samtals 900 landsleiki eða 39,1 að meðaltali. Gamla metið þar var frá því á HM á ítalíu 1990 þegar hópurinn hafði leikið 32,2 landsleiki að meðaltali fyrir keppnina.

Í samantekt Guardian er einnig bent á það meðalaldur heimsmeistaraliðs Ítala fyrir fjórum árum var 29,0 ár og meðalaldur Inter-liðsins sem vann Meistaradeildina á dögunum var 29,7 ár. Það er því að þeirra mati ekkert alltof slæmt að tefla fram reyndu og gömlu liði.