Boateng-bræður í sögubækurnar

Hálfbræðurnir Jerome og Kevin-Prince Boateng komust í sögubækur HM í knattspyrnu í dag þar sem þeir eigast nú við í leik Þýskalands og Gana sem hófst klukkan 18.30. Er þetta í fyrsta sinn sem bræður mætast sem andstæðingar í leik á HM.

Báðir ólust þeir upp í Þýskalandi en faðir þeirra er frá Gana og ákvað Kevin-Prince á síðasta ári að sækja um að fá að spila með landsliði Gana.

Kevin-Prince hafði spilað með yngri landsliðum Þýskalands en ekki fengið tækifæri með A-landsliðinu. Hann er 23 ára gamall, tveimur árum eldri en Jerome sem gekk nýverið í raðir Manchester City frá Hamburg.

Kevin-Prince hefur verið fastamaður í byrjunarliði Gana á mótinu en Jerome er nú í fyrsta sinn í byrjunarliði Þjóðverja. Hann leikur í stöðu vinstri bakvarðar í stað Holger Badstuber.

Eldri bróðurinn lék með Portsmouth í vetur og varð einn hataðasti maður Þýskalands í vor þegar hann tæklaði þýska landsliðsfyrirliðann Michael Ballack, leikmann Chelsea, í úrslitum ensku bikarkeppninnar með þeim afleiðingum að Ballack meiddist og missti af HM.