Oprah rakaði mottuna af Dr. Phil í beinni

Áhorfendur þáttar Opruh Winfrey ætluðu ekki að trúa sínum eigin augum þegar Oprah tók upp flugbeitta raksköfu og rakaði mottuna af sjónvarpssálanum Dr. Phil á föstudaginn, eina frægustu mottu Bandaríkjanna.

Oprah Winfrey fagnar tíu ára afmæli tímaritsins O í New York nú um helgina og stendur fyrir alls kyns uppákomum. Dr. Phil mætti í viðtal hjá henni vegna þess að hann hefur skrifað fastan dálk í tímaritið frá upphafi.

Í viðtali við hann kom í ljós að honum þótti eitt besta ráðið sem hann hefur gefið að hrista upp í hlutunum. Oprah tók hann á orðinu og rakaði af honum mottuna.

„Ég er búinn að vera með mottuna í 40 ár. Ég á tvö börn sem hafa aldrei séð mig án hennar," sagði Dr. Phil. Honum fannst hann ber eftir raksturinn en Oprah sagði hann unglegri og stal fyrsta kossinum í kjölfarið.

Hér má sjá myndbandið af rakstrinum mikla.