Umfjöllun: Ólafur Karl skellti blautri tusku í andlit KR-inga í Garðabæ

Kjartan Henry Finnbogason skoraði tvívegis fyrir KR gegn Stjörnunni í kvöld en það dugði þó aðeins til jafnteflis. Varamaðurinn Ólafur Karl Finsen jafnaði fyrir Stjörnuna í 2-2 skömmu fyrir leikslok en það urðu lokatölur leiksins.

KR-ingar eru því aðeins með tvö stig eftir þrjár umferðir sem er langt undir væntingum í Vesturbænum. Það var þó allt annað að sjá til spilamennsku liðsins frá leiknum gegn Selfossi í síðustu umferð.

Stjarnan byrjaði leikinn mun betur og komst yfir strax á sjöttu mínútu þegar bakvörðurinn Baldvin Sturluson skoraði laglegt mark eftir aukaspyrnu frá Daníeli Laxdal. Baldvin hefur leikið vel í upphafi mótsins.

Kjartan Henry fékk tvö ágætis færi áður en hann náði að jafna á sextándu mínútu. KR náði í kjölfarið algjörum tökum á leiknum en fleiri urðu mörkin ekki í fyrri hálfleiknum.

Seinni hálfleikur fór nokkuð rólega af stað en eftir hrikaleg varnarmistök heimamanna skoraði Kjartan sitt annað mark á 64. mínútu og staðan orðin 2-1. Í kjölfarið fengu KR-ingar tvö virkilega góð tækifæri til að gera út um leikinn með þriðja markinu en náðu því ekki.

Þeim var refsað fyrir það á 88. mínútu þegar Ólafur Karl skoraði eftir klafs í teignum. Spurningamerki má setja við viðbrögð Þórðar Ingasonar í markinu en hann var virkilega óöruggur í leiknum. Mikil vonbrigði fyrir Vesturbæjarliðið en Stjörnumenn voru augljóslega mun ánægðari með úrslitin.

Viktor Bjarki Arnarsson sýndi loks af hverju hann var í atvinnumennsku. Eftir skammarlega frammistöðu í fyrstu tveimur leikjunum steig hann upp í kvöld og stóð sig frábærlega.

En það er ekkert grín að mæta Stjörnumönnum á gervigrasinu og ekkert hægt að bóka þar. Garðbæingar hafa öflugt lið og lögðu ekki árar í bót þó róðurinn hafi verið nokkuð þungur um tíma.

Stjarnan - KR 2-2

1-0 Baldvin Sturluson (6.)

1-1 Kjartan Henry Finnbogason (16.)

1-2 Kjartan Henry Finnbogason (64.)

2-2 Ólafur Karl Finsen (88.)

Áhorfendur: 1.292

Dómari: Magnús Þórisson (6)

Tölfræðin:

Skot (á mark): 11-13 (5-5)

Varin skot: Bjarni 3 - Þórður 3

Horn: 5-4

Aukaspyrnur fengnar: 17-17

Rangstöður: 0-0

Stjarnan 4-5-1

Bjarni Þórður Halldórsson 5

Baldvin Sturluson 7

Daníel Laxdal 5

Tryggvi Sveinn Bjarnason 6

Jóhann Laxdal 7

Dennis Danry 6

Bjarki Páll Eysteinsson 4

(50. Ólafur Karl Finsen 6)

Halldór Orri Björnsson 8

Atli Jóhannsson 6

(86. Hilmar Hilmarsson -)

Þorvaldur Árnason 5

Steinþór Freyr Þorsteinsson 5

KR 4-4-2

Þórður Ingason 4

Skúli Jón Friðgeirsson 6

Baldur Sigurðsson 7

Mark Rutgers 4

Guðmundur Reynir Gunnarsson 7

Gunnar Örn Jónsson 5

Bjarni Guðjónsson 7

Viktor Bjarki Arnarsson 8* - Maður leiksins

Óskar Örn Hauksson 7

Guðjón Baldvinsson 6

(90. Björgólfur Takefusa -)

Kjartan Henry Finnbogason 8