Blatter hlær að áhyggjum samkynhneigðra

Ýmsir réttindahópar samkynhneigðra hafa gagnrýnt þá ákvörðun FIFA að halda heimsmeistaramótið 2022 í Katar. Samkynhneigð er bönnuð með lögum í landinu.

„Þau ættu bara að halda sér frá öllum kynlífsathöfnum," sagði Sepp Blatter í gríni þegar hann var spurður út í áhyggjur samkynhneigðra að vera útilokaðir frá mótinu.

Blatter bætti svo við með alvarlegri tón: „Ég er viss um að það verða engin vandamál hvað þetta varðar þegar heimsmeistaramótið verður haldið í Katar."

Á heimasíðu samkynhneigðra fótboltaáhugamanna er tilkynning þar sem mótmælt er þeirri ákvörðun að halda heimsmeistaramót í landi þar sem réttindi þeirra séu ekki virt.