Hodgson nýtur stuðnings nýju eigendanna

John Henry og eignarhaldsfélag hans, NESV, hafa lýst yfir stuðningi við Roy Hodgson, stjóra Liverpool.

NESV gekk í fyrradag frá kaupum á Liverpool og liðið mætir Everton í dag. Félaginu hefur gengið skelfilega í upphafi tímabilsins í haust en Hodgson tók við liðinu í sumar. Liverpool hefur ekki byrjað verr í 57 ár.

„Við höfum trú á Roy,“ sagði Tom Werner, einn meðeigenda NESV, í samtali við breska ríkisútvarpið í dag.

„Það er enginn ánægður með gengi Liverpool í upphafi tímabilsins en Roy þarf að fá tíma. Við sjáum enga ástæðu fyrir því að Roy ætti ekki að vera þjálfari Liverpool í ár og á næstu árum.“

John Henry og félagar hans í NESV eru í stúkunni á Goodison Park en leikur Liverpool og Everton hefst núna klukkan 12.30.