Ancelotti: Treysti Terry til að eiga stjörnuleik

Carlo Ancelotti, stjóri Chelsea, segir að John Terry fái allt hans traust. Terry hefur verið gagnrýndur eftir dapra frammistöðu Englands á HM í sumar og mörg mistök á undirbúningstímabilinu.

Þá hefur frammsitaða Terry utan vallar einnig verið mikið í umræðunni. Ancelotti er viss um að Terry sínar bestu hliðar á sunnudag þegar Chelsea mætir Manchester United í leiknum árlega um Samfélagsskjöldinn.

„Það er erfitt að segja til um hvort JT sé 100% heill. Hann hefur gert nokkur mistök en það er eðlilegt eftir að hafa bara æft í einhverja sjö daga," segir Ancelotti.

„Hann er enn frábær leikmaður og frábær fyrirliði. Ég treysti honum fullkomlega til að eiga stórleik á sunnudag."

Ancelotti verður án aðalmarkvarðarins Petr Cech, miðvarðarins Alex og hægri bakvarðarins Jose Bosingwa í leiknum. Þá er líklegt að Didier Drogba byrji á bekknum. Hilario mun standa í markinu.

„Þó allir mínir menn séu ekki í fullu standi þá verður þetta ekki auðvelt fyrir United. Þessi leikur er mikilvægur að því leyti að hann segir mikið til um hvar við stöndum," segir Ancelotti.