Robbie Keane skoraði þrennu fyrir Celtic í skoska bikarnum

Robbie Keane er búinn að finna markaskónna hjá Celtic því hann skoraði þrennu í 3-0 sigri liðsins á Kilmarnock í átta liða úrslitum skosku bikarkeppninnar í dag.

Keane er búinn að skora 8 mörk í 8 leikjum með Celtic síðan að hann kom þangað á láni frá Tottenham í janúarglugganum.

Keane skoraði mörkin sín á 18 mínútna kafla í seinni hálfleik, það fyrsta kom á 64.mínútu og svo skoraði hann tvö mörk með mínútu millibili á 81. og 82. mínútu.

Þetta var svolítil uppreisn æru fyrir Robbie Keane sem lék líka fyrsta leik sinna fyrir Celtic á heimavelli Kilmarnock, Rugby Park, en þá tapaði Celtic og Keane gekk ekki vel.