Maradona: Vélin okkar er að hitna

Diego Armando Maradona, landsliðsþjálfari Argentínu, er ekkert að missa sig þó svo lið hans hafi byrjað HM í Suður-Afríku með stæl.

"Það þýðir ekkert að tala um okkur sem líklega sigurvegara strax. Við komum hingað til þess að berjast í þessari keppni. Ég veit svolítið út á hvað svona keppni gengur. Ég hef engan áhuga á einhverju tali um að við séum líklegasta liðið til þess að vinna keppnina. Hlutirnir geta breyst fljótt í svona keppni," sagði Maradona.

Hann vill þó alls ekki draga úr því hversu ánægður hann sé með byrjun liðsins á mótinu.

"Ég er ánægður með það sem hefur gerst hingað til. Við erum þéttir í vörninni og sterkir í sókninni. Þetta er kappakstur og vélin okkar er rétt að hitna."

Suður-Amerísku liðin hafa staðið sig mjög vel í upphafi mótsins og Maradona er með skýringar á því.

"Undankeppnin okkar er miklu erfiðari en í Evrópu. Ekvador er lið sem gæti hæglega verið á HM. í Evrópu spila liðin við Færeyjar."