Sýning á verkum Munch á Íslandi

Í Listasafni Íslands verður opnuð á morgun sýning á úrvali átján grafíkverka eftir norska listamanninn Edvard Munch. Það var góðvinur listamannsins, Christian Gierløff, sem af rausnarskap sínum færði íslensku þjóðinni fimmtán grafíkverk að gjöf árið 1947. Þrjú verk bárust skömmu síðar, eða 1951, að gjöf frá Ragnari Moltzau útgerðarmanni en þau voru hluti af stórri gjöf grafíkverka eftir norska listamenn.

Elst þessara 18 verka er þurrnálarmyndin Veika barnið - Det syke barn, frá 1894, en yngsta verkið er steinþrykkið Mannkynssagan - Historien, frá 1914, en eins og svo margar þrykkmyndir Munchs, eru báðar myndir byggðar á málverkum listamannsins. Fyrir skömmu var handmáluðu eintaki af Historien rænt úr galleríi í Ósló.

Edvard Munch færði nýja tilfinningalega vídd í myndlistina og ruddi brautina í grafíkinni með nýstárlegri tækni. Megnið af þeim grafíkverkum sem eftir hann liggja vann hann á árunum 1894-1944. Hann lærði myndlist m.a. hjá Christian Krogh, og hóf feril sinn í impressíóniskum anda, sem snemma varð blandinn táknhyggju út frá persónulegri reynslu, þar sem veikindi, dauði og þjáningarfull mynd af samskiptum kynjanna verða áberandi viðfangsefni.

Síðla haustið 1894 gerði Munch sínar fyrstu þurrnálar- og steinprentsmyndir.

Ætla má að bæði aukin dreifing verka hans og tekjuvon hafi drifið hann áfram. Mörg fyrstu grafíkverkin voru byggð á sömu mótífum og hann hafði unnið með í málverkunum svo sem Ópið, Madonna og Veika barnið.

Eftir stormasamt líf framan af ævi hafði hann hægara um sig og settist að á Kragerø, undan suðurströnd Noregs. Þar kom hann jafnframt upp grafíkverkstæði og þrykkti sjálfur. Grafíkverk Munch eru enn fáanleg á stóru uppboðshúsum heimsins og fara á háu verði. Sýningin stendur til 5. september.

pbb@frettabladid.is