Innlent

Fimmtán sagt upp á fréttastofu RÚV

Mynd/Pjetur

Fimmtán starfsmönnum á fréttastofu Ríkisútvarpsins var sagt upp gær og í dag og þar á meðal eru fréttamenn, tæknimenn og annað starfsfólk. Fyrir uppsagnirnar störfuðu rúmlega 100 starfsmenn á fréttastofunni og því fengu um 15% starfsmanna þar uppsagnarbréf. Alls var 30 fastráðnum starfsmönnum hjá RÚV sagt upp sem og 10 verktökum og fólki í tímavinnu.

Páll Magnússon, útvarpsstjóri, boðaði til starfsmannafundar eftir hádegi þar sem hann gerði starfsmönnum sínum grein fyrir breytingunum en RÚV þarf alls að skera niður um fjögur hundruð milljónir króna. Útsendingar svæðisstöðva Ríkisútvarpsins verða lagðar niður á næstunni og var fréttamönnum á svæðisstöðvunum sagt upp.

Samkvæmt heimildum Vísis eru fréttamennirnir Borgþór Arngrímsson, Elín Hirst, Friðrik Páll Jónsson, Guðrún Frímannsdóttir og Jóhanna Margrét Einarsdóttir í hópi þeirra sem sem fengu uppsagnarbréf. Einnig var Elsu Maríu Jakobsdóttur, Jóhönnu Vilhjálmsdóttur og Þóru Tómasdóttur liðsmönnum Kastljóss sagt upp.




Tengdar fréttir

Blóðugur niðurskurður á RÚV: Elín Hirst meðal þeirra sem var sagt upp

Fréttakonunni Elínu Hirst og dagskrágerðarkonunum Þóru Tómasdóttur, Elsu Maríu Jakobsdóttur og Jóhönnu Vilhjálmsdóttur, hefur verið sagt upp störfum hjá RÚV. Þeim var tilkynnt um uppsagnirnar í dag en þær verða tilkynntar formlega á morgun samkvæmt heimildum Vísis.

Mörður: Páll segi af sér og skili jeppanum

Varaþingmaður Samfylkingarinnar vill að Páll Magnússon segi af sér sem útvarpsstjóri. Hann gagnrýnir stjórn stofnunarinnar og tekur upp hanskann fyrir Vinstri græna og ályktun sem samþykkt var flokksráðsfundi flokksins um síðustu helgi þar sem þungum áhyggjum var lýst af stöðu fjölmiðla á Íslandi.

RÚV hafnar aðdróttunum Vinstri grænna

Stjórn Ríkisútvarpsins harmar ályktun flokksráðs Vinstri grænna um síðustu helgi og „hafnar þeim aðdróttunum sem þar er beint að starfsfólki og starfsemi RÚV.“ Stjórnin telur ályktunina meiðandi fyrir starfsfólk Ríkisútvarpsins og lýsa fádæma vanþekkingu flutningsmanna og þeirra sem hana samþykktu.

Útsendingar svæðisstöðva RÚV lagðar niður

Útsendingar svæðisstöðva Ríkisútvarpsins verða lagðar niður á næstunni. Þremur starfsmönnum stofnunarinnar á Austurlandi hefur verið sagt upp og húsnæði RÚV á Egilsstöðum er til sölu. Þetta kemur fram á fréttavefnum Austurgluggi.is

Mest lesið


Fleiri fréttir

Sjá meira


×

Mest lesið