Ancelotti: Munum vinna United

„Við áttum skilið að vinna þennan leik en við munum vinna þann næsta," sagði Carlo Ancelotti, knattspyrnustjóri Chelsea, eftir að lið hans gerði 1-1 jafntefli við Tottenham í gær.

Næsti leikur Chelsea er gegn Manchester United næstkomandi sunnudag. Það er heldur betur mikilvægur leikur fyrir þá bláu sem hafa hikstað hressilega undanfarnar vikur.

„Það er ekki hægt að kvarta yfir frammistöðunni gegn Tottenham. Við reyndum okkar besta til að vinna. En þó að það hafi ekki tekist þá erum við á réttri leið og skiljum erfiðu tímana eftir fyrir aftan okkur eftir þennan leik," sagði Ancelotti.

Hann reiknar með því að Frank Lampard snúi aftur í byrjunarliðið í leiknum gegn United.