Rooney meiddur á ökkla og æfði ekki í dag

Wayne Rooney meiddist á ökkla í 1-1 jafnteflinu á móti Bandaríkjamönnum í fyrsta leik enska landsliðsins á HM sem fram fór á laugardagskvöldið. Rooney var ekki með á æfingu enska landsliðsins í dag.

Á meðan félagar Rooney æfðu þá var Rooney í endurhæfingu í sundlaug hótelsins með sjúkraþjálfara enska landsliðsins. Það er ekki talið að meiðslin séu alvarleg og Rooney getur að öllum líkindum spilar með á móti Alsír á föstudagskvöldið.

Wayne Rooney var sjóðheitur þegar hann meiddist á ökkla í leik á móti Bayern Munchen í Meistaradeildinni í vetur og hefur síðan átt í vandræðum með að ná sér góðum.

Ledley King var einnig með Rooney í sundlauginni í dag en læknalið enska liðsins óttast um að hann geti ekki spilað meira með í keppninni vegna nárameiðsla.

Góðu fréttir dagsins voru hinsvegar þær að Gareth Barry æfði með liðinu og ætti að vera klár í slaginn á móti Alsír.