Ledley King ekki meira með á HM?

Óvíst er hvort Ledley King leiki meira á Heimsmeistaramótinu í Suður-Afríku. Fabio Capello tók þá áhættu að láta hann byrja leikinn gegn Bandaríkjunum og sú ákvörðun reyndist kolröng.

Eins og reyndar tvær aðrar ákvarðanir hjá Capello, að láta Robert Green byrja í markinu og veikan James Milner á kantinum, reyndist hún röng. King fór af velli í hálfleik.

Jamie Carragher byrjar væntanlega í hans stað við hlið John Terry í næsta leik. Carragher sýndi veikleika sína þegar hann missti öskufljótan framherja Bandaríkjanna, Jozy Altodore, framhjá sér í leiknum en einnig styrk sinn þegar hann náði Robbie Findley og henti honum frá boltanum.

King var á æfingu Englands í morgun en alls er óvíst hvort hann nái að spila meira. Þá eru aðeins eftir Carragher, Michael Dawson sem hefur aldrei spilað alvöru landsleik, og Matthew Upson.

Reynsla Carragher verður tekin fram yfir þá báða en King verður í það minnsta ekki með í leiknum gegn Alsír.