Raggi Bjarna rappar eins og brjálæðingur með Erpi

„Ég hélt að ég ætti að syngja þarna. Hann lét mig syngja smá og svo bara rappa. Þetta er ekkert Vorkvöld í Reykjavík, ég get alveg lofað þér því,“ segir stórsöngvarinn Ragnar Bjarnason.

Erpur Eyvindarson vinnur nú að sinni fyrstu sólóplötu sem stefnt er á að verði gefin út í júní. Hann fékk einn ástsælasta söngvara þjóðarinnar, sjálfan Ragga Bjarna, til að rappa á plötunni, og segir að hann hafi staðið sig gríðarlega vel þegar á hólminn var komið. Fjölmargir gestir koma einnig fram á plötunni. Félagar Erps úr XXX Rottweiler, þeir Bent og Lúlli, koma báðir við sögu ásamt Emmsjé Gauta og fleiri þungavigtarmönnum úr íslenska hipphopp-heiminum.

„Þetta var alveg stórkostlegt. Erpur er svo skemmtilegur, þetta er eldklár strákur. Ég hef aldrei gert þetta fyrr, ég rappa og rappa eins og brjálæðingur þarna,“ segir Raggi. „Hann henti mér beint út í djúpu – og lingóið, maður. Ég hef aldrei séð þetta fyrr. Erpur var að segja mér að hann gæti þýtt þetta svo að fólk gæti skilið. Þetta er nýtt mál sem þeir nota rappararnir.“

En hlustarðu mikið á rapptónlist? „Ég hef hlustað á Erp – ég hef alltaf haft gaman af þessum strák. Ég hef ekki hlustað á neina aðra.“

Raggi og Erpur kynntust fyrir nokkrum árum þegar sá fyrrnefndi fór í viðtal til þess síðar­nefnda. Þeir hittust svo fyrir nokkrum mánuðum þegar Erpur var byrjaður að vinna að plötunni.

„Hann spurði hvort ég væri til í að gera þetta. Ég hélt það nú,“ segir Raggi. „Svo hittumst við um daginn í Stapanum þar sem við vorum að skemmta fyrir Fjölbrautaskóla Suðurnesja og hann sagði að það væri komið að þessu.“

Erpur þykir mikill strigakjaftur og samdi textann fyrir Ragga, en óttaðist Raggi ekki að hann færi yfir strikið? „Það er nú það, ég veit ekki hvað hann var að láta mig bulla – ég skildi þetta ekki. Nei, ég held ekki. Hann passar upp á mig, lætur mig ekki gera einhverja dellu!“

atlifannar@frettabladid.is