Cheryl Cole á nýjum kúr

Söngkonan Cheryl Cole segist fylgja matarkúr sem er sérstaklega ætlaður hennar blóðflokki. „Móðir mín sagði mér frá þessum kúr. Þar er tekið mið af blóðflokki manns við fæðuval og mér ráðlagt að neyta ekki ákveðinnar fæðu.

Eftir að ég byrjaði á kúrnum líður mér mun betur bæði líkamlega og andlega og er ég einnig orkumeiri en áður,“ sagði söngkonan sem hefur bæst í hóp stjarna á borð við fyrirsætuna Miröndu Kerr og söngvarann Cliff Richard sem einnig fylgja kúrnum.

Cole skildi við eiginmann sinn, fótboltamanninn Ashley Cole, fyrir skemmstu og hefur einbeitt sér að söngferli sínum síðan. Hún viðurkenndi einnig að hún fari sjaldan í ræktina því hún þurfi þess ekki.

„Ég hef í mörgu að snúast þessa dagana og það heldur mér í góðu formi. Þess utan eyði ég miklum tíma í dansæfingar og annan undirbúning fyrir tónleikahald og það er mikið púl að dansa marga klukkutíma á dag.“