Bæði lið fögnuðu í Jóhannesarborg - Þýskaland mætir Englandi

Þýskaland og Gana tryggðu sér í kvöld sæti í 16-liða úrslitum HM í knattspyrnu þó svo að Þjóðverjar hefðu unnið Gana, 1-0, í Jóhannesarborg í kvöld.

Gana komst áfram þar sem að Ástralía vann óvæntan 2-1 sigur á Serbum á sama tíma í hinum leik D-riðils.

Þýskaland varð því í efsta sæti riðilsins sem þýðir að liðið mætir sínum gömlu erkifjendum frá Englandi strax í 16-liða úrslitunum á sunnudaginn klukkan 14.00. Gana varð í öðru sæti með fjögur stig, rétt eins og Ástralía, en með betra markahlutfall. Gana mætir Bandaríkjunum í 16-liða úrslitunum á laugardag.

Staðan var enn markalaus í hálfleik í báðum leikjum. Leikirnir voru þó fjörugir og versnuðu ekki þegar mörkin bættust við í síðari hálfleik.

Þjóðverjinn Mesut Özil hafði komist einn inn fyrir vörn Gana í fyrri hálfleik en lét verja frá sér. Hann bætti fyrir þetta á 60. mínútu er hann skoraði sigurmark Þýskalands með glæsilegu þrumuskoti.

Skömmu eftir þetta rigndi inn mörkunum í hinum leiknum. Ástralir, sem steinláu fyrir Þjóðverjum í fyrstu umferð riðlakeppninnar, komust í 2-0 forystu gegn Serbum, sem unnu Þjóðverja í síðasta leik. Mörkin skoruðu Tim Cahill með glæsilegum skalla og svo Brett Holman með föstu skoti.

Serbar náðu svo að hleypa mikilli spennu í leikinn á lokamínútum leiksins eftir að varamaðurinn Marko Pantelic færði sér mistök markvarðarins Mark Schwarzer í nyt og skoraði af stuttu færi.

Serbar þurftu því aðeins að skora eitt mark í viðbót til að tryggja sig áfram en það tókst þeim ekki þrátt fyrir ágæt færi auk þess sem að þeir vildu einnig fá vítaspyrnu undir blálok leiksins.

Mark Serba gerði út um vonir Ástrala sem hefðu þurft að vinna 4-0 í kvöld til að komast áfram á kostnað Gana. Bæði lið voru því heldur niðurlút í leikslok enda á leiðinni heim frá Suður-Afríku.