Þjálfarar í Pepsi-deild karla spá Spánverjum sigri á HM

Heimsmeistarakeppnin í knattspyrnu hefst í dag með tveimur leikjum. Opnunarleikur mótsins er milli Suður-Afríku og Mexíkó og hefst klukkan 14.00.

Liðin eiga það sameiginlegt að hafa ekki náð að vinna íslenska landsliðið á undanförnum átta mánuðum. Klukkan 18.30 hefst síðan leikur Frakklands og Úrúgvæ.

Fréttablaðið leitaði til þjálfara Pepsi-deildar karla og fékk þá til að spá fyrir um hvaða þjóð lyftir heimsbikarnum í Jóhannesarborg 11. júlí næstkomandi.

Fimm þjóðir fengu atkvæði frá þjálfurunum tólf, þar á meðal fengu Svisslendingar óvænt atkvæði frá Heimi Hallgrímssyni, þjálfara ÍBV.

Fjórir þjálfarar spá Spáni heimsmeistaratitlinum en þrír hafa trú á því að Diego Maradona geri Argentínumenn að heimsmeisturum og bjóði heiminum síðan upp á nektarhlaup í miðborg Búenos Aíres. Tveir þjálfarar hafa mesta trú á Englandi og aðrir tveir velja Brasilíu.

Hér fyrir neðan er spá þjálfaranna tólf í Pepsi-deild karla:

Willum, Keflavík - Argentína

Ólafur, Breiðabliki - Spánn

Þorvaldur, Fram  - Argentína

Gunnlaugur, Val - Brasilía

Heimir, ÍBV - Sviss

Bjarni, Stjörnunni - Spánn

Ólafur, Fylki - England

Heimir, FH - Brasilía

Guðmundur, Selfossi - Argentína

Logi, KR - England

Andri, Haukum - Spánn

Ólafur Örn, Grindavík - Spánn