Anelka kallaði Domenech hóruson - Hnakkrifust í hálfleik

Nicolas Anelka og Raymond Domenech hnakkrifust í hálfleik í 2-0 tapi Frakka gegn Mexíkó á fimmtudaginn. Staðan í hálfleik var 0-0. Það er L´Equipe blaðið franska sem greinir frá þessu í dag. Þar segir að Anelka hafi meðal annars kallað þjálfarann sinn "hóruson". Domenech var óánægður með hversu mikið Anelka fór úr stöðunni sinni og skipti honum af velli í hálfleik. Þetta endurspeglar enn einu sinni ömurlegt ástand franska landsliðsins þar sem óeining virðist ráða ríkjum og þjálfarinn virðist ekki vita sitt rjúkandi ráð. Frakkar verða að vinna heimamenn í Suður-Afríku í lokaumferðinni til að eiga einhvern möguleika á því að komast áfram.