Darren Bent: Stærsti draumurinn minn er að komast á HM

Darren Bent hefur skorað fimm mörk í síðustu þremur leikjum Sunderland og hefur með því átt mikinn þátt í að koma lærisveinum Steve Bruce í gang á ný.

Bent er í baráttu um gullskóinn við Wayne Rooney og vonast eftir því að komast með honum á HM í Suður-Afríku í sumar.

„Stærsti draumurinn minn er að komast á HM og ég óska þess fremur en nokkurs annars að komast með til Suður-Afríku," segir Darren Bent sem hefur skoraði 20 deildarmörk í vetur eða sex mörkum minna en Rooney.

„Ég skoraði svipað mikið af mörkum fyrir fjórum árum en þá fékk ég ekki að fara með. Það er dálítið fyndið að ég sé í sömu kringumstæðum núna," sagði Darren Bent.

„Steve Bruce hefur verið að berjast fyrir mínu sæti í hópnum og ef ég held áfram á sömu braut og læt verkin tala inn á vellinum þá kemst ég kannski með," segir Bent.