Robinho skoraði tvennu í fyrsta heimaleiknum með Santos

Robinho hefur byrjað vel með Santos í Brasilíu og í nótt skoraði hann tvö mörk í sínum fyrsta heimaleik með liðinu síðan í ágúst 2005. Santos vann þá 6-3 sigur á Bragantino.

Robinho skoraði annað og fimmta mark Santos-liðsins í leiknum og þegar hann skoraði seinna markið sitt hljóp hann til tveggja ára sonar síns og fagnaði með honum.

Santos náði með þessu fjögurra stiga forustu í Paulista-keppninni en liðið hefur unnið alla þrjá leiki sína með Robinho sem hefur skorað þrjú mörk síðan að hann kom til liðsins á láni frá Manchester City.