Brasilíumenn kvöddu Suður-Afríku með tárum

Brasilíumenn voru slegnir eftir tapið gegn Hollandi í gær. Brassar sýndu frábæra takta í fyrri hálfleik og spiluðu sem heimsmeistarar væru. Sýndu sambatakta og voru óheppnir að skora ekki meira en eitt mark í fyrri hálfleiknum. Robinho kom þeim yfir eftir aðeins tíu mínútna leik.

Þrátt fyrir fjölmörg tækifæri, þar sem Maarten Stekelenburg varði meðal annars stórkostlega, náðu Brassar ekki að bæta við.

Og það reyndist þeim dýrkeypt. Felipe Melo var skúrkurinn, hann byrjaði á því að skora sjálfsmark eftir fyrirgjöf frá Wesley Sneijder sem jafnaði leikinn fyrir Holland. Næst átti hann að dekka Sneijder í horni þar sem Hollendingurinn stangaði boltann inn eftir flotta útfærslu. Hann kórónaði svo ömurlegan leik sinn með því að traðka viljandi á Arjen Robben og fékk fyrir vikið rautt spjald.

Hollendingar voru miklu betri í seinni hálfleiknum og áttu sigurinn skilinn. Brassarnir voru heillum horfnir og voru aldrei nálægt því að jafna leikinn.

Sneijder var ánægður með baráttuna í Hollendingum. „Í hálfleiknum sögðum við allir við hver annan að við ætluðum að gefa algjörlega allt í leikinn, og það gerðum við. Við börðumst fyrir hver annan," sagði Sneijder.

„Í seinni hálfleiknum settum við pressu á Brasilíumenn og að skora tvisvar var algjörlega frábært. Við erum komnir í fjögurra liða úrslit. Það er ekki annað hægt en að vera ánægður en á næstu dögum þurfum við að koma okkur niður á jörðina," sagði markaskorarinn Sneijder.

Dunga viðurkennir að Brasilíumenn séu slegnir yfir tapinu. „Við erum allir gríðarlega svekktir og við bjuggumst ekki við þessu. Við náðum ekki að halda sama góða leik í seinni hálfleik eins og þeim fyrri," sagði Dunga sem er nú samningslaus og mun að öllum líkindum hætta með liðið.

Julio Cesar markmaður var tárvotur í viðtali eftir leikinn. „Þetta er enginn heimsendir. Núna verðum við bara að halda haus. Pressan í Brasilíu var mikil og enginn bjóst við þessum úrslitum," sagði Cesar en margir leikmenn liðsins brustu í grát á vellinum.

Bert van Marwijk, þjálfari Hollands, sagði að liðið hefði getað tapað leiknum á fyrstu fimmtán mínútunum. „Í hálfleik sagði ég við þá að þeir yrðu bara að spila sinn leik. Við urðum svo bara betri og betri eftir að við jöfnuðum," sagði þjálfarinn og sagði svo að Melo myndi skammast sín fyrir frammistöðuna.