Eurovision: Níu dagar í fyrstu æfingu

„Við erum ekki búin að panta miða í Norrænu. Við ætlum að bíða með það fram á síðustu stundu," segir Jónatan Garðarsson, fararstjóri íslenska Eurovision-hópsins.

Askan frá eldgosinu í Eyjafjallajökli er enn að setja flugsamgöngur úr skorðum í Evrópu og nú styttist í að Eurovision-hópurinn haldi út til Osló. Samkvæmt opinbera skipulaginu er fyrsta æfing íslenska hópsins 17. maí þannig að ferðadagur er einum til tveimur dögum fyrir þann tíma.

Jónatan segir Norrænu vissulega vera möguleika en hann sé fjarlægur. „Það myndi útheimta meiri kostnað, við þyrftum að leigja langferðabíl undir allt dótið. Ef þessi staða kæmi upp, að flugsamgöngur frá landinu lægju niðri í marga daga, þá yrðum við samt sem áður að skoða þennan möguleika."

Hann bendir þó á að það hafi komið fyrir í sögu Eurovision að þátttakendur hafi ekki getað mætt á tilsettum tíma. „Ég hefði þá samband við yfirstjórn NRK (norska ríkissjónvarpið) og EBU (Evrópska sjónvarpssambandið) og tilkynnti um seinkun. Æfingar hópsins yrðu færðar til í samræmi við það."

Eldgosið í Eyjafjallajökli hefur þó haft nokkur áhrif á þátttöku Íslands. Í ár munu myndbrot frá hverju landi birtast á skjám Evrópubúa í stað myndbrota frá landinu sem heldur keppnina. Upptökumenn frá norska sjónvarpinu hafa hins vegar ekki komist til Íslands.

„Þeir eru fastir núna á Írlandi og við erum því að gera þetta fyrir þá. Sjónvarpið tekur upp einn bút og Saga Film annan," útskýrir Jónatan.

- fgg