Gogoyoko þarf hundrað milljónir

Tónlistarveitan og netsamfélagið Gogoyoko.com er í miðju hlutafjárútboði um þessar mundir og bindur vonir við að afla yfir eitt hundrað milljóna króna áður en þessi mánuður er á enda.

„Við erum á öllum áætlununum sem við höfum lagt upp með. Félagið er mjög vel rekið og þetta er ekkert sem er að koma okkur á óvart,“ segir Haukur Davíð Magnússon, framkvæmdastjóri Gogoyoko og einn af stofnendum fyrirtækisins.

„Eins og allir þekkja sem eru í nýsköpun fer mikil vinna í að koma hlutum af stað. Þetta er barátta við að halda sér gangandi og koma sér í sjálfbærni. En við höfum fengið mjög góð viðbrögð við okkar kynningum og erum bjartsýn á að fyrr en seinna munum við taka við fjármagni til að fara í næsta tveggja ára fasa með félagið.“

Í byrjun síðasta árs var gengið frá samningum fjárfestingarfélags í eigu Nýsköpunarsjóðs atvinnulífsins og Vilhjálms Þorsteinssonar, stjórnarformanns CCP, við Gogoyoko um fjármögnum fyrirtækisins. Nam upphæðin hundrað milljónum króna. Næsta skref er semsagt að tvöfalda þá tölu og rúmlega það.

Rætt hefur verið bæði við innlenda og erlenda aðila og hefur Íslandsbanki verið Gogoyoko til aðstoðar. „Félagið hefur verið að tikka í þessi box sem það ætlaði sér að gera og ég vil ítreka að það er vel rekið og undir rekstraráætlunum,“ segir Haukur Davíð.

Fréttablaðið hefur heimildir fyrir því að brátt muni stjórnendur Gogoyoko eiga erfitt með að greiða sér laun vegna peningaskorts. „Það er ekkert hægt að fullyrða um það. Við erum með sterka aðila sem eru inni í félaginu og það er mikil trú á félaginu,“ segir Haukur og vonast eftir því að komandi samningafundir eigi eftir að gefa góða raun varðandi framtíðina. - fb