Portúgalir sprengdu upp kóresku vörnina - myndband

Portúgalar vöknuðu til lífsins á HM í dag er liðið rúllaði yfir Norður-Kóreu, 7-0. Portúgal er því svo gott sem komið áfram í 16-liða úrslit keppninnar.

Það tók Portúgala 29. mínútur að komast yfir í leiknum en fyrsta markið skoraði Raul Meireles. Þannig stóðu leikar í háfleik en í síðari hálfleik opnuðust allar flóðgáttir.

Simao Sabrosa skoraði annað mark Portúgala á 53. mínútu. Hugo Almeira skoraði svo á 56. mínútu og Tiago bætti fjórða markinu við á 60. mínútu.

Liedson skoraði níu mínútum fyrir leikslok, Ronaldo skoraði skrautlegt mark stuttu síðar og Tiago skoraði sjöunda markið áður en yfir lauk. Lygileg frammistaða.

Portúgalska liðið spilaði virkilega vel í síðari hálfleik og sprengdi upp vörn kóreska liðsins hvað eftir annað.

Portúgal er því komið í annað sæti riðilsins með 4 stig en Kórea er á botninum með ekkert stig og er úr leik. Fílbeinsströndin er með 1 stig og Brasilía 6.

Fílabeinsströndin þarf því að vinna Kóreu stórt í lokaumferðinni og treysta á sigur Brasilíu gegn Portúgal til þess að komast áfram.

Hægt er að sjá mörkin og tilþrifin úr leiknum hér.