Özil hefur verið betri en Messi á HM

Klaus Allofs, framkvæmdarstjóri Werder Bremen, telur að þýski landsliðsmaðurinn Mesut Özil hafi verið betri en Lionel Messi á HM í Suður-Afríku.

Özil hefur verið frábær í leikjum Þýskalands til þessa á HM en liðið mætir næst Messi og félögum í argentínska landsliðinu í fjórðungsúrslitum.

„Ég hef ekki séð neinn á HM spila betur en Özil. Hann er ótrúlegur leikmaður og sannarlega í heimsklassa. Það hefur enginn verið betri en hann í Suður-Afríku, ekki einu sinni Lionel Messi," sagði Alfons.

Özil hefur verið orðaður við sum stærstu félög Evrópu, til að mynda Inter og Barcelona. Hann er 21 árs gamall.