Mögnuð endurkoma hjá Bandaríkjamönnum - myndband

Bandaríkjamenn sýndu gríðarlega seiglu er þeir nældu í stig gegn Slóvenum eftir að hafa lent tveimur mörkum undir. Lokatölur í leiknum 2-2.

Bandaríkjamenn voru reyndar óheppnir því þriðja markið var dæmt af þeim á einhvern stórfurðulegan hátt.

Valter Birsa kom Slóveníu yfir með laglegu skoti utan teigs strax á 13. mínútu. Zlatan Ljubijankic kom Slóveníu síðan í 2-0 rétt fyrir hlé og þeir í toppmálum.

Landon Donovan minnkaði muninn fyrir Bandaríkjamenn á 48. mínútu og Michael Bradley jafnaði síðan leikinn átta mínútum fyrir leikslok.

Slóvenar eru á toppi C-riðils með 4 stig en Bandaríkjamenn hafa 2. England er með 1 stig og Alsír 0 en þau mætast síðar í kvöld.

Hægt er að sjá tilþrifin úr leiknum hér.