Laug til um kynhneigð til að sleppa við leikfimi

Besti körfuboltamaður landsins, Snæfellingurinn Hlynur Bæringsson, verður í nærmynd í þættinum Íslandi í dag í kvöld. Hlynur var á laugardag valinn besti körfuboltamaður landsins og í gærkvöldi var greint frá því að hann væri á leið í atvinnumennsku til Svíþjóðar eftir frábæra frammistöðu á Íslandsmótinu þar sem Snæfell landaði fyrsta Íslandsmeistaratitlinum í sögu félagsins.

Í nærmyndinni verður það meðal annars rifjað upp þegar Ólafur Stefánsson vildi fá Hlyn í raðir handboltalandsliðsins fyrir Ólympíuleikana í Peking eftir að lið Íslands datt úr leik á EM í Noregi.

Þá kemur það einnig fram að þessum mikla íþróttamanni þótti svo leiðinlegt og tilgangslaust að mæta í leikfimi á sínum yngri árum að hann greip til þess ráðs að ljúga til um kynhneigð sína.

Ísland í dag hefst kl. 18.55.