Strengir úti í mýri

Tónleikaröðin „Klassík í Vatnsmýrinni“ hefur göngu sína í Norræna húsinu í kvöld þegar þær Laufey Sigurðardóttir fiðluleikari og Elísabet Waage hörpuleikari leika verk eftir Louis Spohr, Jórunni Viðar og Béla Bartók. Auk þess frumflytja þær nýtt verk eftir Þuríði Jónsdóttur.

Klassík í Vatnsmýrinni er tónleikaröð Félags íslenskra tónlistarmanna í samvinnu við Norræna húsið með áherslu á norrænt og alþjóðlegt samstarf. Markmiðið með tónleikaröðinni er að gefa áheyrendum tækifæri til að hlýða á fyrsta flokks innlenda og erlenda listamenn með áherslu á „einleikarann“ annars vegar og „kammertónlist“ hins vegar.

Aðgangseyrir á tónleikana er 1.500 krónur, 1.000 fyrir félagsmenn F.Í.T. en ókeypis fyrir gesti yngri en 21 árs.