Bjarni og Hólmar léku í naumu tapi gegn Anderlecht

U-21 árs landsliðsmennirnir Bjarni Þór Viðarsson og Hólmar Örn Eyjólfsson voru í eldlínunni með liði sínu Roeselare og léku allan leikinn gegn Anderlecht í belgísku úrvalsdeildinni í kvöld en Anderlecht vann leikinn 1-2.

Heimamenn í Roeselare náðu forystu í leiknum með marki Nikita Rukavytsya á 26. mínútu en gestirnir í Anderlecht jöfnuðu leikinn tíu mínútum síðar með marki Ondrej Mazuch og staðan var jöfn 1-1 í hálfleik.

Í síðari hálfleik dró til tíðinda þegar um hálftími lifði leiks að Matías Suarez kom gestunum yfir.

Um tíu mínútum fyrir leikslok fékk svo markaskorararinn Mazuch að líta rauða spjaldið en stuttu áður hafði Hólmar Örn fengið gula spjaldið.

Heimamenn náðu þó ekki að nýta sér liðsmuninn og niðurstaðan því sem segir 1-2 sigur Anderlecht.