Platini vill ekki að fótboltinn breytist í Playstation-leik

Michel Platini, forseti UEFA, er ekki hlyntur því taka upp marklínutækni í fótboltanum því hann telur að þá væru menn búnir að stíga fyrsta skrefið í átt að breyta fótboltanum í Playstation-leik eins og hann orðar það sjálfur. Platini er á því að stærsta verkefnið í að bæta dómgæslu sé að dómararnir öðlist meiri virðingu hjá þeim sem koma að leiknum.

„Einn dómari er ekki nóg ekki í nútímafótbolta þar sem það eru 20 myndavélar á vellinum. Það er ósanngjarnt því myndavélarnar sjá allt en dómarinn er bara með tvö augu. Í hvert skipti sem dómarinn gerir mistök þá gera myndavélarnar sér mat úr því," sagði Michel Platini í viðtali við heimasíðu skoska knatspyrnusambandsins.

„Ég hef talað um það í tíu ár að breyta starfi dómarans, bæta vinnuaðstæðurnar og styðja betur við bakið á dómurunum. Það er ljóst að dómarar munu gera mistök og þú þarf eiginlega að vera masókisti til þess að verða dómari. Ég hef vitað það í 40 ár að kerfið er ekki nógu gott," sagði Platini.

„Það þurfa allir að hjálpa dómurunum, félögin, stuðningsmennirnir, leikmennirnir, fjölmiðlarnir og yfirvaldið. Það bera allir ábyrgð í þessu máli. Við erum búnir að bæta við tveimur aðstoðardómurum og það er bara raunhæft að bæta við tveimur augum til viðtbótar til þess að aðstoða dómarann," sagði Platini.