Capello vissir þú þetta? England búið að vinna alla leikina með Walcott

Það var mikið skrifað í ensku blöðunum um þá ákvörðun Fabio Capello að skilja Arsenal-manninn Theo Walcott eftir heima og velja hann ekki í 23 manna HM-hóp sinn. Capello tók greinilega ekki mikið mark á frábærri sigurtölfræði Walcott á landsliðsferli hans.

Enska landsliðið hefur nefnilega unnið alla ellefu landsleikina sem Walcott hefur tekið þátt í, sex þeirra hafa verið í undankeppni HM og fimm þeirra hafa verið vináttulandsleikir. Hann hefur byrjað 9 leiki og komið 2 inn á sem varamaður. Markatala enska liðsins í þessum 11 leikjum Walcott er 38-7.

Theo Walcott hefur byrjað alla landsleiki hjá Fabio Capello þar sem hann hefur verið laus við meiðsli og var í byrjunarliðinu í æfingaleikjunum á móti Mexíkó og Japan.

Daily Mail þóttist vera búið að finna ástæðu þess að Walcott situr eftir heima. Samkvæmt þeirra heimildum þá gagnrýndi Capello víst Theo Walcott á vídeó-fundi eftir leikinn á móti Mexíkó.

Capello vildi að Walcott myndi sækja utan á bakvörðinn og reyna að koma boltann fyrir markið en oftar en ekki sótti Walcott inn á völlinn og missti boltann í umræddum leik á móti Mexíkó.

Þegar Theo Walcott hlustaði ekki á fyrirmæli ítalska þjálfarans í leiknum á móti Japan og var uppvís að því að gera sömu mistök þá á Capello að hafa ákveðið að veðja frekar á þá Aaron Lennon og Shaun Wright- Phillips

Landsleikir Theo Walcott:

30. maí 2010 Japan 2-1 sigur

24. maí 2010 Mexíkó 3-1 sigur

3. mars 2010 Egyptaland 3-1 sigur

10. júní 2009 Andorra 6-0 sigur

6. júní 2009 Kasakstan 4-0 sigur

15. október 2008 Hvíta-Rússland 3-1 sigur

11. október 2008 Kasakstan 5-1 sigur

10. september 2008 Króatía 4-1 sigur (skoraði 3 mörk)

6. september 2008 Andorra 2-0 sigur

1. júní 2008 Trínídad og Tobagó 3-0 sigur

30. maí 2006 Ungverjaland 3-1 sigur