Pelé: Maradona elskar mig

Boxbardaginn endalausi á milli Pelé og Maradona ætlar engan enda að taka og nýjasta höggið kom frá Pelé. Þeir tveir hafa rifist eins og litlir krakkar í sandkassa um gröfuna og er ekkert sem bendir til þess að stríðsöxin verði grafin í bráð.

"Allur heimurinn veit að Maradona elskar mig. Hann dáir mig. Þegar hann byrjaði með sjónvarpsþáttinn sinn í Argentínu þá hringdi hann í mig. Hann var að safna peningum fyrir Boca Juniors og ég mætti," sagði Pelé.

Maradona sagði á dögunum að Pelé ætti heima á safni og einhver þyrfti að skutla honum aftur þangað. Aðspurður um þau ummæli sagði Pelé.

"Maradona elskar mig. Þegar hann þarf á athygli að halda þá heiðrar hann mig."