Aserbaídsjan auglýsir grimmt fyrir Eurovision og sendir Íslandi kveðju

Þessa dagana má víða um netið sjá auglýsingar þar sem lagið frá Aserbaídsjan er sagt vera sigurstranglegast í Eurovision-keppninni í Noregi.

„Sjáið hana í rigningu! Sjáið hana í sundlauginni! Sigurstranglegasta lagið í Eurovision," stendur í auglýsingunni sem netmeistararnir frá Aserbaídsjan kokkuðu upp í kringum lagið Drip Drop með söngkonunni Safura Alizade. Þessi herferð er þó ekki algalin og vekur mikla athygli. Lagið er komið í efsta sæti hjá flestum veðbönkum. Þar er Ísland aftur á móti oftast í kringum 23. sætið.

Teymið frá Aserbaídsjan ætlar alla leið með lagið og heimsækir sjö lönd fyrir keppnina. Í upphafi var kynnt að Ísland yrði einn áfangastaðanna en því hefur nú verið breytt. Þar gætu eldsumbrotin í Eyjafjallajökli spilað inn í.

Þrátt fyrir það fá Íslendingar sérstaka sumarkveðju á heimasíðu Safuru á eurovisiontalents.com, sem merkilegt nokk er skrifuð á öllum tungumálum keppninnar, þar með talið íslensku. Svona hljómar kveðjan:

„Elskurnar mínar!

Þetta er til allra Íslendinga. Gleðilegan sumardaginn fyrsta! Ég var að komast að því að á sumardaginn fyrsta (er hann í alvörunni 22. apríl? Kemur nokkuð sumar fyrr en um miðjan júní!!!) taka Íslendingar sig til og gefa hvert öðru gjafir! Börn fá sumargjafir og hjón færa hvert öðru kaffi í rúmið. Kannski fær einhver heppin ungmeyja trúlofunarhring í sumargjöf - eins og hún Beyonce mín myndi segja, ,,ef þú ert hrifinn af því, skelltu á það hring"! En að öllu gamni slepptu vil ég óska ykkur gleðilegs sumars án eldsumbrota og góðra og rausnarlegra kærasta til að bjóða ykkur út, færa ykkur blóm og knúsa ykkur fast. Faðmlög, kossar og við sjáumst í Osló!"

Hér má sjá myndbandið við lag Safuru, Drip Drop.

Hér er sumarkveðjan til Íslendinga.