Harry Kewell: Rosetti er búinn að drepa keppnina fyrir mér

Harry Kewell, leikmaður Ástralíu, er allt annað en sáttur eftir að hafa verið vikið af velli í síðasta leik og verður þar með í leikbanni í næsta leik. Kewell fékk boltann í hendina innan vítateigs í leiknum og þar með beint rautt spjald. Kewell segir að dómari leiksins Roberto Rosetti hafi drepið heimsmeistarakeppnina fyrir sér. „Það er synd að þetta skuli hafa farið svona. Boltinn fór í hendina á mér en þetta var ekki viljandi. Ég var að reyna setja öxlina fyrir boltann en ekki hendina. Ég held að dómari leiksins geti aðeins haft svör við þessari ákvörðun," sagði Kewell svekktur. „Ég var að spila eftir reglum og reyndi að setja líkamann fyrir boltann en alls ekki hendina, það var aldrei meiningin. Dómarinn sá þetta öðruvísi en hann er örugglega sá eini sem gerði það," sagði Kewell pirraður við fjölmiðla. „Roberto Rosetti er búinn að drepa heimsmeistaramótið fyrir mér."