Össur Skarphéðinsson: Fundinum ekki rétt lýst

„Menn eiga að vara sig á því að taka mark á fundargerðum af þessu tagi sem eru gerðar einhliða og oft skrifaðar eftir minni. Það er margt sem er ekki rétt í þessu minnisblaði," sagði Össur Skarphéðinsson, utanríkisráðherra, þegar hann var spurður út í minnisblað sem lak út frá fundi embættismanna utanríkisráðuneytisins og staðgengils sendiherra Bandaríkjanna í síðustu viku.

Það var formaður Sjálfstæðisflokksins, Bjarni Benediktsson, sem óskaði eftir að taka málið fyrir utan dagskrá á Alþingi en þar gagnrýndi hann Össur harðlega fyrir að reyna að koma í veg fyrir þjóðaratkvæðagreiðsluna auk þess sem hann sakaði íslensk stjórnvöld um að reyna að velta Icesave-skuldunum yfir á Noreg með það að markmiði að endurgreiða þeim síðar.

Formaður Framsóknarflokksins, Sigmundur Davíð Guðlaugsson orðaði þá atburðarrás reyndar á ameríska vegu og sagði í ræðustól: „Eða eins og Bandaríkjamenn segja, You couldn´t make this stuff up."

Össur vísaði því alfarið á bug að Íslendingar hefði reynt að velta Icesave-skuldunum yfir á Noreg en sagðist kannast við orðróm þess eðlis hafi verið á sveimi í norskum fjölmiðlum. Sá orðrómur hafi komið sér á óvart. En sjálfur hefði hann ekki heyrt af þessu.

„Í mörgum atriðum er frásögn bandaríska staðgengilsins ónákvæm miðað við það sem mínir menn hafa sagt mér," sagði Össur. Hann segir að íslenskir fulltrúar hafi ekki talað um greiðslufall og þjóðargjaldþrot við staðgengil sendiherrans, heldur hafi eingöngu verið vitnað í bréf ríkisstjórnar sem var sent forseta Íslands degi áður en hann synjaði Icesave-lögunum staðfestingar. Össur segir að þar hafi komið fram í sjötta tölulið að ef hann synjaði lögunum ykjust líkur á greiðslufalli ríkisins.

„Það er fráleitt að hann hafi lýst yfir greiðslufalli íslenska ríkisins," sagði Össur svo.