Hearts vann Edinborgarslaginn

Eggert Gunnþór Jónsson heldur áfram að gera það gott á Easter Road, heimavelli Hibernian í Edinborg.

Hearts vann í dag góðan 2-0 sigur á Hibernian í Edinborgarslag í skosku úrvalsdeildinni.

Eggert Gunnþór lék í vörn Hearts í dag en hann hefur nú alls átta sinnum leikið á þessum velli en tapað aðeins einu sinni.

Í síðasta mánuði var hann í U-21 liði Íslands sem vann U-21 landslið Skota á Easter Road, 2-1, og tryggði sér þar með sæti í úrslitakeppni EM í Danmörku á næsta ári.

Hearts er í fjórða sæti deildarinnar með sautján stig en Rangers fór aftur á toppinn í dag með 3-1 sigri á St. Mirren á útivelli. Rangers er með 31 stig og Celtic 30.