Jafntefli dugði Suður-Kóreu - Argentína með fullt hús

Argentína og Suður-Kórea tryggðu sér í kvöld sæti í 16-liða úrslitum heimsmeistarakeppninnar í Suður-Afríku.

Argentína vann 2-0 sigur á varnarsinnuðu liði Grikkja eftir að Martin Demichelis kom liðinu yfir á 77. mínútu. Markið kom upp úr hornspyrnu en Demichelis þrumaði knettinum í netið af stuttu færi. Fram að því höfðu Grikkir lagt upp úr því að halda marki sínu hreinu sama hvað það kostaði.

Gamla brýnið Martin Palermo kom svo inn á í liði Argentínu á 81. mínútu og skoraði aðeins sjö mínútum síðar. Lionel Messi átti skot sem Tzorvas varði í marki Grikkja. Boltinn barst til Palermo sem skoraði af öryggi.

Diego Maradona gerði sjö breytingar á liði Argentínu enda liðið búið að tryggja sér sæti í 16-liða úrslitunum fyrir leikinn. Messi var þó í liðinu en hann var fyrirliði í fjarveru Javier Mascherano sem hvíldi, rétt eins og sóknarmennirnir Carlos Tevez og Gonzalo Higuain.

Þá komst Suður-Kórea áfram eftir 2-2 jafntefli við Nígeríu í líflegum leik. Nígería komst yfir með marki Kalu Uche strax á tólftu mínútu en Jung-Soo Lee jafnaði metin fyrir Suður-Kóreu áður en flautað var til leikhlés.

Chu Young Park, leikmaður Monaco í Frakklandi, kom svo Suður-Kóreu yfir með marki beint úr aukaspyrnu í upphafi síðari hálfleiks.

En þá kom að þætti Nígeríumannsins Yakubu. Á 67. mínútu náði Yussu Ayila sendingu framhjá markverði Suður-Kóreu og boltinn barst fyrir fætur Yakubu sem stóð inn í miðjum markteignum, fyrir framan opnu marki Kóreumanna. En á einhvern ótrúlegan máta tókst honum að renna boltanum framhjá af rúmlega meters færi. Ótrúlegt klúður sem fer sannarlega í sögubækurnar.

Hann fékk þó tækifæri til að bæta fyrir mistökin aðeins tveimur mínútum síðar er vítaspyrna var dæmd á Suður-Kóreu. Hann skoraði af miklu öryggi úr spyrnunni. Lars Lagerbäck, þjálfari Nígeríu, tók hann svo af velli skömmu eftir að leikur hófst að nýju.

Jafnteflið dugði þó Suður-Kóreumönnum til að komast áfram en liðið hlaut fjögur stig, Grikkland þrjú og Nígería eitt. Argentína varð í efsta sæti B-riðils með fullt hús stiga.

Það er því ljóst að Úrúgvæ mætir Suður-Kóreu í 16-liða úrslitum á laugardag en á sunnudaginn eigast við Argentína og Mexíkó.